Spáin sem því miður rættist

Faroe Petroleum og samstarfsaðilar þess í olíuleitar- og vinnsluleyfi númer 1 á íslenska landgrunninu hafa skilað inn leyfinu sínu. Þetta kemur ekki á óvart, enda var alltaf nokkuð augljóst að Faroe Petroleum hafði vart fjárhagslega burði til að ráðast í þær rannsóknir sem nauðsynlega eru til að staðreyna hvort olía er á svæðinu. Um þetta má vísa til fyrri skrifa Orkubloggsins.

Í þessu sambandi er reyndar svolítið skemmtilegt að sjá rök Faroe Petroleum og annarra leyfishafa fyrir því að leyfinu sé skilað. Í fréttatilkynningu Orkustofnunar um skilin á leyfinu segir að skv. leyfishöfum hafi niðurstöður frumrannsókna þeirra á leyfissvæðinu bent til þess „að frekari endurkastsmælingar í næsta áfanga myndu ekki skila tilætluðum árangri vegna basaltlaga, einangruðum við austurjaðar Drekasvæðisins, þar sem þau skyggja á það sem undir liggur.“ Þarna segir einnig að það sé mat leyfishafa „að aðrar rannsóknaraðferðir, að undanskildum borunum, myndu ekki auka umtalsvert líkurnar á að finna kolvetnisgildrur á leyfissvæði[nu].“

Niðurstaða Faroe Petroleum er sem sagt sú að ómögulegt sé að staðreyna olíu á leitarsvæðinu nema með borunum - vegna þess hversu basaltið á svæðinu gerir bergmálsmælingar ónákvæmar. En það lá alltaf ljóst fyrir að þetta væri langlíklegast - og að svo til útilokað væri að fá nægilega skýrar vísbendingar um olíu á svæðinu nema með borunum. Það var ekki bara Orkubloggarinn, sem hélt þessu fram. Heldur má sjá þetta í ýmsum gögnum sem lágu fyrir í aðdraganda þess að leyfi til olíuleitar á Drekasvæðinu voru auglýst og afgreidd. Í þessu sambandi má t.d. vísa til skýrslu Íslenskra orkurannsókna (ÍSOR) frá árinu 2007, en þar segir m.a. eftirfarandi:

Eins og lauslega hefur verið imprað á áður er eitt stærsta vandamálið við kortlagningu setlaganna með hljóðendurvarpsmælingum það að basaltþekjan, sem myndaðist í upphafi reksins, hylur bróðurpartinn af svæðinu, sérstaklega syðri hlutann. Víða er þó hægt að sjá í eldra set undir basaltinu. Basalthulan tvístrar og endurkastar megninu af hljóðinu sem notað er til kortlagningar staflans, en það getur dregið verulega úr þeim upplýsingum sem hægt er að vinna úr. 

Basaltið er sem sagt að þvælast fyrir - og það hefur alltaf verið vitað að svo væri. Og það er vandséð að bergmálsmælingar eða aðrar frumrannsóknir munu nokkru sinni geta skilað mjög skýrum niðurstöðum um olíu á svæðinu. Það eru að vísu sumstaðar á Drekasvæðinu e.k. glufur þar sem basaltið er ekki jafn mikil fyrirstaða rannsókna eins og er víðast á svæðinu. Mögulega voru Faroe Petroleum og félagar alveg sérstaklega óheppnir með val á leitar- og vinnslusvæði.

Nú liggur ekki aðeins fyrir að Faroe Petroleum hafi gefist upp á svæðinu, heldur hefur þeim og viðskiptafélögum þeirra vegna leyfisins ekki tekist að finna áhugasamt fyrirtæki til að kaupa leyfið. Þessi niðurstaða hlýtur að vera talsverð vonbrigði fyrir leyfishafana. 

Það vekur athygli að Faroe Petroleum, sem er skráð á breskan hlutabréfamarkað, virðist ekki ennþá hafa tilkynnt hlutabréfamarkaðnum um skil sín á umræddu leyfi. Það sýnir kannski vel hversu litlar væntingar fyrirtækið alltaf hafði um verðmætasköpun af þessu leyfi.

Nú verður fróðlegt að sjá hvernig hinum tveimur olíuleitar og -vinnsluleyfunum reiðir af. Þar er eitt geysilega fjárhagslega sterkt félag meðal leyfishafa, þ.e. kínverska olíufyrirtækið CNOOC. Áætlað er að fljótlega (jafnvel næsta sumar, þ.e. 2015) verði gerðar endurvarpsmælingar á þessum tveimur leyfissvæðum. Þá mun vonandi skýrast hvert framhaldið þar verður.

Athugasemdir

[Jichang Lulu (IP-tala skráð) 14.12.2014 kl. 16:16]

...basaltþekjan... hylur bróðurpartinn af svæðinu, sérstaklega syðri hlutann.

Syðri hlutinn er þar, sem liggur leyfisvæðið CNOOCs og Eykons. Þau virðast þó vera bjartsýnni en Faroe...

[Ketill Sigurjónsson, 14.12.2014 kl. 16:43]

Svæði CNOOC teygir sig reyndar lika langt norður. En talandi um „bjartsýni“ þá er allt þetta tal um milljarð tunna eða þrjá mlljarða tunna bara óskhyggja. Enda segir Heiðar Már í viðtalinu „ef“ olían er þarna... o.s.frv. Þetta EF er prýðileg staðfesting á því að þetta tal um stóra olíulind er hálfgert leikrit. Ennþá veit enginn hvort einhverja vinnanlega olíu er að hafa á svæðinu. Það eina jakvæða sem liggur fyrir er að jarðfræðin þarna gefur væntingar um að finna megi olíu. Hvort olían væri vinnanleg eða í miklu magni er aftur á móti ekkert vitað um ennþá.