Bresk vindorka dýrari en raforka um sæstreng

Bloomberg New Energy Finance (BNEF) var að gefa út nýtt mat á kostnaði við raforkuframleiðslu. Þar kemur fram mat BNEF á því hvað kostar að framleiða nýja megavattstund af raforku.

Niðurstöðurnar eru þær að kostnaður í bæði vind- og sólarorku hefur verið að lækka. En kostnaður við raforkuframleiðslu með kolvetnisbruna hefur hækkað. Sú hækkun stafar m.a. af því að eftir því sem vindorka verður ódýrari og nýting hennar algengari, minnkar hagkvæmni gas- og kolaorkuvera. Því tíminn lengist sem slík orkuver eru ekki á fullum afköstum. Þetta má orða þannig, að lækkandi kostnaður vindorku (og sólarorku) veldur því að nýting kola- og gasorkuvera minnkar og þar með verður slík hefðbundin raforkuframleiðsla óarðbærari en ella.

Fyrir Ísland er kannski áhugaverðast það mat BNEF að raforka framleidd með vindrafstöðvum í sjó, þ.e. utan við ströndina, er álitin kosta að meðaltali um 174 USD/MWst. Þetta er ámóta orkuverð eins og bresk stjórnvöld sömdu nýverið um vegna byggingar nýrra vindorkuvera þar.

Til samanburðar má hafa í huga að raforka framleidd á Íslandi og flutt um sæstreng til Bretlands gæti verið seld á um 120-180 USD/MWst (þegar flutningskostnaður er með talinn, sbr. skýrsla McKinsey). Og að raforkuverðið sem íslensku raforkusalinn fengi gæti þá verið á bilinu 80-140 USD/MWst. Þessar verðhugmyndir rúmast bersýnilega innan þess svigrúms sem umræddur vindorkukostnaður í Bretlandi veitir. Þess vegna virðist óneitanlega sem sæstrengur geti boðið upp á mjög arðsöm raforkuviðskipti fyrir Ísland.

Athugasemdir

[Ufsi (IP-tala skráð) 12.10.2015 kl. 23:27]

Að Bretar séu tilbúnir til að borga okkur svipað verð og þeir greiða hálfgerðu tilraunaverkefni sem framleiðir raforku langt yfir smásöluverði er vægast sagt vafasöm ályktun. Það væri einstaklega heimskulegt af þeim að senda styrkina og niðurgreiðslurnar til Íslands frekar en að efla innlenda framleiðslu. Smásöluverðið er því eina verðið sem við getum notað til viðmiðunnar. Allt annað eru bara skemmtilegir draumórar en ekki neitt sem byggjandi er á.

[Ketill Sigurjónsson, 13.10.2015 kl. 12:26]

Ufsi skilur greinilega ekki að það er miklu betra fyrir breskan almenning að eiga aðgang að tryggu íslensku vatnsafli (auk jarðvarma) heldur en dyntóttri breskri vindorku. Og hefur sennilega ekki áttað sig á því að í Bretlandi er lagaheimild til að láta sæstrengsorku hafa slík sérverð. Dapurlegast er þó að Ufsi komi ekki fram undir nafni með gagnrýni sína.