Mikið tap í kínverska áliðnaðinum

Samkvæmt þessu nýlega grafi frá norska ál- og orkufyrirtækinu Norsk Hydro er um eða rúmlega 30% af álframleiðslu heimsins nú að skila tapi. Þá er átt við að kostnaður vegna um eða rúmlega 30% af öllu framleiddu áli er hærri en tekjurnar sem fást fyrir álið (cash-cost).

Langmest af álframleiðslunni sem þannig skilar nú tapi er í Kína. Enda er þar nú unnið hörðum höndum að því að draga úr álframleiðslu. Rétt er að minna á að í dag er rúmlega helmingur af öllu áli sem framleitt er í heiminum einmitt framleitt í kínverskum álverum.

Athuga ber að þegar umrætt graf brtist var álverð á LME um 1.550 USD/tonn (sbr. viðmiðunarlínan a grafinu). Í dag er verðið aðeins lægra eða um 1.500 USD.

Loks má taka fram að bæði álver Norðuráls (Century Aluminum) og Fjarðaáls (Alcoa) liggja nánast lengst til vinstri á grafinu. Þ.e. þau eru í litlum hópi álvera þar sem framleiðslukostnaðurinn er með því allra lægsta í heiminum. Það stafar ekki síst af mjög lágu raforkuverði til bæði Norðuráls og Fjarðaáls (nú milli 10-15 USD/MWst; orkuverðið til Fjarðaáls er örlítið hærra en til Norðuráls). Í því sambandi má minna á að í einu uppgjöri Century Aluminum sagði einmitt að "Grundartangi smelter in Iceland generates significant free cash flow in virtually all price environments".

Álver ÍSAL í Straumsvík (Rio Tinto Alcan) er sennilega með cash-cost sem liggur nálægt meðaltalinu eða rétt undir því. Og er því nálægt sársaukamörkum nú þegar álverð er svo lágt sem raunin er. Þess vegna er nú lögð mikil áhersla á sparnað í Straumsvík, þ.e. að halda aftur af launakostnaði. En álverð þarf þó ekki að hækka mikið til að tryggja Straumsvík jákvætt fjárflæði.

Athugasemdir

[Benóný Jónsson Oddaverji, 16.12.2015 kl. 19:04]

Það vantar einingu á x-ás á grafinu sem þú sýnir, sem gerir myndina marklausa. Væri fróðlegt að sjá mynd þar sem íslensku álverin eru sérlituð og sýnt hvar þau væru í kúrfunni, ásamt nánari upplýsingum um hvað x-ás sýnir. :)

[Ketill Sigurjónsson, 16.12.2015 kl. 19:34]

Talan á x-ás eru framleidd tonn af áli (m.v. 2015).