Völva og snillingur

Í dag bárust skilaboð í tölvupósthólf Orkubloggsins. Frá EIA; upplýsingaskrifstofu bandaríska Orkumálaráðuneytisins.

Þetta er svo sem ekki í frásögur færandi. Því sjálfsagt hafa milljónir annarra ef ekki miklu fleiri fengið nákvæmlega þennan sama póst. Sem fær okkur öll til að brosa út að eyrum. En Orkubloggarinn er sem sagt áskrifandi að öllum helstu tilkynningum EIA (US Energy Information Administration) um orkutölfræði.

Það athyglisverða við póst dagsins var að EIA sendi þarna út spá sína um að eftirspurn eftir olíu muni aukast á næstu vikum. Og verðið muni af þessum ástæðum stíga eitthvað á næstunni; a.m.k. fram í júlí.

Ekki vorum við aðdáendur svarta gullsins fyrr búnir að lesa þennan nýjasta spádóm olíuvölvunnar miklu en olíuverðið á Nymex tók að hækka. Og fór hvorki meira né minna en yfir 70 dollara tunnan nú þegar leið á daginn. Mikill er máttur skriffinnanna hjá EIA vestur í Washington DC.

Hver hefði trúað því á frostdögunum í febrúar s.l. þegar olíutunnan lafði rétt í 35 dollurum, að verðið myndi verða tvöfalt hærra á sveittum sumardegi í New York fjórum mánuðum síðar? Vissulega var Orkubloggarinn ávallt staðfastur á því að olíutunnan færi í ca. 70-75 dollara. Það væri bara tímaspursmál hvenær Sádarnir næðu tökum á framboðinu. Kannski óþarfi að minna enn einu sinni á það að 70-75 dollarar er nefnilega einmitt verðið sem Sádarnir þurfa til að ríkiskassinn þar verði ekki tómur. Svo einfalt er það nú.

En jafnvel Orkuofvitann að baki blogginu óraði ekki fyrir því að þetta myndi gerast svona hratt. Vesturlönd eru í dúndrandi fjármálakreppu og samt er olíuverðið komið í þá tölu sem Sádarnir vilja... en Vesturlönd hata þetta sama verð!

Hvað segir þetta okkur? Að framtíðin sé björt og efnahagslífið verði brátt komið á bullandi skrið um allan heim? Eða að besti vinur bloggarans, hann Ali Al Naimi olíumálaráðherra Sádanna, sé einfaldlega snillingur? Hann ætlaði sér að ná verðinu upp. Lét OPEC skera niður framleiðsluna í nokkrum áföngum - næstum helst til varlega að Orkublogginu fannst. En viti menn - aðeins hálfu ári síðar er óskaverð Sádanna komið fram. Alveg magnað.

Já - kallinn er brilljant. Og tilefni fyrir hann að kasta kuflinum í svona eins og eina kvöldstund og smella sér í kúl lúkkið. Svarti leðurjakkinn bíður í skápnum og nóttin er ung.

Illar tungur - eða öllu heldur apagreiningadeildirnar vestra - segja okkur reyndar að þessar hækkanir á olíuverði undanfarið séu bara til komnar vegna veikingar á dollar. Geisp. Alltaf eru þessir greiningadeildakjánar samir við sig. Málið er einfalt; olíuverðið er komið yfir 70 dollara tunnan vegna þess að honum Ali Al Naimi og félögum tókst ætlunarverk sitt. Nú þurfa þeir bara að passa upp á það að áframhaldandi hrun efnahagslífsins hér í Vestrinu dragi ekki olíuverðið niður á ný.

Nei - ljúflingarnir þarna í sandinum gula mega ekki verða værukærir. En þeir geta a.m.k. leyft sér að brosa í dag. Sjálfur ætla ég núna í háttinn. Af einhverjum ástæðum sofna ég nefnilega alltaf svo vært þegar ég veit að honum Ali Al Naimi líður vel. Smitandi gleði.

Athugasemdir

[Arnar H. Arnarson (IP-tala skráð) 10.6.2009 kl. 08:51]

Í okkar þrengingum vildi ég óska að við Íslendingar ættum ríkulegar olíulindir sem við gætum nýtt til að rétta við vægast sagt dapurlegt efnahagsástand hér á landi.

En því miður er ekki því til að heilsa og það sem verra er, litlar líkur eru á því að sá draumur rætist.  Hef ekki mikla trúa á því að vinnanlega olíu sé að finna á Drekasvæðinu.

Og þó svo að við eigum að teljast til að eiga ríkulegar orkuauðlindir í formi vants- og varmaorku, virðist almenningsálitið vera þróast í þá átt að ekki megi nýta þessar orkulindir, einungis horfa á þær.  Hér ráða umhverfisfasistar þróun mála og virðast þeirra viðhorf ætla að verða ofan á.  Því miður.  

Þess vegna lítur út fyrir að efnahagsleg þróun verði niður á við á næstu árum og við munum eyða tíma og fjármunum í að finna "eitthvað annað" enn eina ferðina.  Fyrst var það loðdýraeldi, svo varð það fiskeldl, því næst ætluðum við í hátækni (Íslensk erfagreining, netfyrirtæki o.þ.h.), næst var það fjármálastarfsemi (sem setti okkur á hausinn og hreinlega á vonarvöl).  Hvaða tilraunastarfsemi verður það næst?

Við verðum að horfa á þetta raunsætt.  Íslendingar eiga bara tvær náttúruauðlindir; fiskinn í sjónum og orkuauðlindir í formi vatns- og varmaorku.  Af hverju ekki að nýta þessar auðlindir okkar?  ÞAÐ ER AF ÞVÍ AÐ HÉR ERU RÍKJANDI VIÐHORF HJÁ FÓLKI SEM EKKI SKILUR HUGTAKIÐ "ATVINNULÍF" OG VILL HREINLEGA FINNA UPP HJÓLIÐ AFTUR.

En þeir sem nýta náttúruauðlindir sínar, framtíðin er björt hjá þeim.