Spenna við Flóann

Margir olíuspekúlantar biðu spenntir eftir föstudeginum sem leið (11. mars 2011). Vegna þess að skyndilega höfðu margir veðjað á að olíutunnan ryki upp. Í 150 USD eða 200 eða þaðan af meira!

Ástæða þess að menn gerðust svo djarfir fyrir helgina að spá æpandi miklum verðhækkunum á olíu, var að boðað hafði verið til víðtækra mótmæla gegn stjórnvöldum í Saudi-Arabíu og áttu þau að fara fram s.l  föstudag. Á ensku var talað um day of rage og sumir töldu þetta geta leitt til óeirða sem myndu trufla olíuframboð frá Sádunum. Eða a.m.k. valda því að markaðurinn færi af taugum og taka til við að hamstra olíu.

Þar að auki hafa þegar orðið einhverjar ryskingar í austustu héruðum Saudi-Arabíu. Það vill svo til að þar býr mikið sjítum, sem eru afar ósáttir við yfirstéttina sem allt eru súnnítar, eins og flestir íbúarnir í landinu. Þar brást lögreglan hart við og skaut á fólk. Og þó svo mótmælin þarna virðast hafa verið kæfð niður, eru menn alls ekki rólegir. Þarna í austurhluta landsins liggja nefnilega margar stærstu og mikilvægustu olíulindir heimsins; ofurlindir eins og Manifa, Khurais og risinn Ghawar.

En föstudagurinn varð ekki sá ófriðardagur í Saudi-Arabíu eins og sumir höfðu búist við. Kannski varð jarðskjálftinn rosalegi við Japan til þess að dreifa huga fólks. Eða kannski hafði stjórnvöldum tekist að hræða fólk - eða jafnvel kaupa sér frið með nýju loforði Sádakonungs um 36 milljarða dollara fjárframlög til ýmissa verkefna. Ekki veitir af í landi þar sem atvinnuleysi ungs fólks er um 40%!

En stjórnvöld í Riyadh   ættu kannski ekki að fagna sigri of snemma. Stór hluti þjóðarinnar er löngu búinn að fá yfir sig nóg af einræðisstjórninni, sem með harðri hendi hefur haldið öllum umbótaöflum niðri. Þar að auki gæti ein allra minnsta þúfan orðið til þess að velta hlassinu. Þar er átt við nágrannaríki Sádanna; smáríkið Bahrain. 

Bahrain á sér merkan sess í olíusögunni því fyrsti olíubrunnurinn á Arabíuskaganum var einmitt grafinn í sandinum í Bahrain (það var 1935). Í dag framleiðir Bahrain einungis um 40 þúsund olíutunnur á dag og skiptir því sáralitlu máli þegar rætt er um olíuframboð í heiminum. En Bahrain er eins og eyja í Súnnítahafi Arabíuskagans. Þar eru um 7/10 allra íbúanna sjítar, en öll valdastéttin eru súnnítar. Súnnítarnir eru lítt spenntir fyrir því að deila peningum og völdum með þorra þjóðarinnar og þarna á milli er því talsverð spenna. Sem gæti blossað upp núna þegar almenningur í öðrum Arabaríkjum hefur risið upp gegn ofríki þaulsetinna valdhafa. Og slíkar óeirðir gætu smitast yfir landamærin til Saudi-Arabíu.

Vert er líka að hafa í huga að líklegt er að sjítarnir í Íran styðji trúbræður sína í Bahrain - hvort sem er opinberlega eða með undirróðri - og hvetji til uppreisnar gegn súnnítastjórninni. Inní þetta blandast bandarískir hernaðar-hagsmunir, því mikilvægasta flotahöfn bandaríska sjóhersins við Persaflóann er í Bahrain. Og allar fyrrnefndar risalindir Sádanna eru rétt handan við landamæri Bahrain að Saudi-Arabíu. Bahrain er því sakleysisleg púðurtunna, sem gæti haft all svakalegar afleiðingar ef hún springur.

 

Athugasemdir

[Bjarki (IP-tala skráð) 14.3.2011 kl. 13:18]

Sádarnir og aðrir nágrannar Bahrain við Persaflóa eru að senda herlið til Bahrain. Það á greinilega að freista þess að kæfa þessa byltingu áður en hún breiðist út.

http://www.bbc.co.uk/news/world-middle-east-12729786

[Ketill Sigurjónsson, 14.3.2011 kl. 13:36]

Nota tækifærið meðan fjölmiðlar og almenningur á Vesturlöndum eru með fókusinn á Japan.

[Ketill Sigurjónsson, 14.3.2011 kl. 17:18]

It is not clear whether the possibility of a GCC force entering a sovereign member-state for policing purposes is technically legal according to the GCC charter, which stipulates that if a sovereign state is threatened, than member states can use force to deter that threat.

http://www.cnbc.com/id/42067393

Nú er bara að sjá hvort Obama verður samkvæmur sjálfum sér og mótmælir ólögmætum aðgerðum gegn íbúum Bahrain!

[Ketill Sigurjónsson, 14.3.2011 kl. 20:01]

Nebb - Bandaríkjastjórn segir ekkert athugavert við afskipti erlendra ríkja af innanríkismálum Bahrain, enda hafi stjórnvöld þar beðið um aðstoðina. Þá má spyrja af hverju aðstoðin sem Gaddafi fær frá málaliðunum sínum sé eitthvað óeðlilegri. Það gengur svona; "ekki sama að vera jón eða séra Jón" er lífseig speki.

http://www.cnbc.com/id/42073871

[Ketill Sigurjónsson, 16.3.2011 kl. 12:50]

Líbýa er komin inná borð Öryggisráðs SÞ. En stjórnvöld í Vestrinu þegja þunnu hjóði um ofbeldið i Bahrain, þar sem hermenn Sádanna eru að reyna að kæfa umbótasinna:

http://www.bbc.co.uk/news/world-middle-east-12755852

[Sigurjón Jónsson, 16.3.2011 kl. 14:05]

Þetta kemur allt í ljós hægt og rólega, þeir sem ráða heiminum gera það sem þeim sýnist. Og hverjir eru þeir jú , stórfyrirtæki og sérstaklega stórir bankar. Það er að segja þeir sem stjórna þessum fyrirtækjum.

Obama gerir ekkert nema spyrja Goldman Sachs fyrst.

það er þess virði að lesa þennan pistil.

http://www.xat.org/xat/moneyhistory.html

[Haraldur Rafn Ingvason, 16.3.2011 kl. 23:18]

Þetta nöldur út af Gaddafí er bara í nösunum á usa og vesturlöndum. Hann fær bæði nægan tíma og frið til að "friða" Líbíu. 

Gaddafí fylgir nefnilega "stöðugleiki"... ekki satt???

[Ketill Sigurjónsson, 18.3.2011 kl. 19:00]

Sádakóngur fleygir fleiri silfurpeningum í rennisteininn, með von um að kaupa sér frið:

Saudi King Orders More Handouts, Security Boost

Published: Friday, 18 Mar 2011 | 8:47 AM ET

King Abdullah last month announced an economic package worth an estimated $37 billion in an initial move to ease social tensions. Friday's measures are significantly more costly, with plans for a building spree set to cost $66.7 billion alone.

http://www.cnbc.com/id/42146910

[Kristján Sigurður Kristjánsson, 18.3.2011 kl. 20:22]

Náttla tóm frekja, en af því að þetta blogg er það vandaðasta væri gott að bloggari setti við það leitarvél.

Takk