Falklandseyjar og Ghana

Í undanförnum færslum hefur Orkubloggið velt fyrir sér hvaða fjárhagslega getu þarf til að leita olíu á Drekasvæðinu. Þar var viðruð sú hugmynd að einkaleyfishafi þurfi að lágmarki að ráða við rannsóknir sem gætu kostað nálægt 200 milljónum USD. Og að jafnvel sé ólíklegt að gera ráð fyrir árangri af olíuleitinni fyrr en eftir a.m.k. nokkra tilraunabrunna, sem gætu kostað nálægt milljarði USD.

Í þessu sambandi hefur Orkubloggið vísað til rannsókna og olíuleitar á nýjum olíuleitarsvæðum við Grænland og Kanada. Og einnig nefnt olíuleit á djúpum svæðum við Ghana, Falklandseyjar og víðar á hafsbotninum. Til að skýra þetta nánar er rétt að skoða aðeins nánar það sem hefur verið að gerast á umræddum svæðum við Ghana og Falklandseyjar.

Þarna er báðum tilvikum um að ræða ný olíluleitarsvæði á djúpum hafsbotnssvæðum, þar sem sérleyfishafar hafa þurft að framkvæma rannsóknir fyrir nokkur hundruð milljónir dollara. Og eins og búast má við á nýjum og áhættusömum svæðum, urðu umrædd sérleyfi á endanum ýmist til að vekja gleði eða sorg hjá sérleyfishöfunum. 

Þurr brunnur við Falklandseyjar 

Djúpt suður í Atlantshafi var einn sérleyfishafinn nýverið að átta sig á því að tilraunabrunnurinn sem þótti svo álitlegur virðist vera skraufþurr. Þetta er á svæði við Falklandseyjar sem nefnt er Stebbing og er sýnt á kortinu hér fyrir ofan. Þarna á Stebbing standa menn nú frammi fyrir því að gefast upp og yfirgefa brunninn. Eða að kýla á það að bora nokkur hundruð metra í víðbót með tilheyrandi kostnaði með þá veiku von í brjósti að enn neðar sé eitthvað alvöru að finna.

Af nýlegum fréttum að dæma er reyndar búið að loka brunninum þarna og afskrifa nokkur hundruð milljónir USD sem tapað fé. Eðli málsins samkvæmt var það ansið þungt högg fyrir viðkomandi sérleyfishafa; breska Borders & Southern Petroleum. Hluthafarnir máttu horfa upp á virði félagsins hrynja um 70% á hlutabréfamarkaðnum - nánast á augabragði.

Ljónheppni í Ghana 

Við Afríkustrendur hitti annað breskt olíufélag, Tullow Oil, aftur á móti hreint ótrúlega vel í mark (í samstarfi við Kosmos Energy). Eftir 3ja ára leit á nýju og djúpu leitarsvæði utan við Ghana kom borinn niður á sannkallaða risalind, sem nefnd hefur verið Jubilee.

Kostnaðurinn við þá árangursríku olíuleit er sagður hafa verið í kringum 300 milljónir USD, þ.e. kostnaðurinn sem fór í olíuleitina eina og sér. Um leið og búið var að finna lindina bættu fjárfestarnir þarna litlum 500 milljónum USD við til að kanna svæðið betur og staðfesta olíumagnið. Samtals hafa nú verið settir nokkrir milljarðar dollara í Jubilee til að koma olíuvinnslunni þar í gang.

Drekinn verður líka dýr 

Í báðum þessum tilvikum - við Ghana og Falklandseyjar - kostaði olíuleit umrædra féaga sem nemur nokkur hundruð milljónum USD. Ekkert gefur tilefni til að ætla að kostnaðurinn verði minni á Drekasvæðinu. Og sá sem tekur áhættuna þar þarf að gera ráð fyrir að sú olíuleit geti farið á hvorn veginn sem er. Að lokum má hér nefna að Orkubloggarinn mun brátt fjalla um hinar raunverulegu ástæður þess að olíufélög hafa sýnt Drekasvæðinu svo lítinn áhuga sem raun ber vitni.

Athugasemdir

[Jón Frímann Jónsson, 25.9.2012 kl. 02:15]

Ég er ekki hissa á því að þetta svæði við Falklandseyjar sé olíulaust. Þarna verða reglulega kraftmiklir jarðskjálftar, allt að 6 að stærð. Einstaka sinnum stærri jarðskjálftar eiga sér þarna stað að auki. Hafi verið olía þarna. Þá eru náttúruöflin löngu búin að fjarlægja viðkomandi olíu.

Hefur verið leitað að olíu norðan við Falklandseyjar?

[Jón Frímann Jónsson, 25.9.2012 kl. 02:18]

Ég var að skoða fréttamiðla á Falklandseyjum, og rakst á þessa frétt hérna frétt. Þeir fundu víst olíu og gas á endanum við Falklandseyjar.

[Ketill Sigurjónsson, 25.9.2012 kl. 08:46]

Já; nokkur olíufélög hafa verið að leita olíu og gasi í landgrunninu utan við Falklandseyjar. Búið er að bora þó nokkra tilraunabrunna. Með misjöfnum árangri, eins og gengur. Borders & Southern héldu að þeir væru komnir með spennandi brunn (jarðvegssýni sýndu skýr merki um kolvetni), en á endanum reyndist hann samt þurr. Það er annað fyrirtæki sem er á Loglio-svæðinu sem þú visar þarna til (það heitir Falkland Oil & Gas). Horfurnar þar virðast nokkuð góðar, en ennþá á þó eftir að staðfesta hvort þar er um að ræða nægjanlegt magn til að standa undir vinnslu. Í fyrra (2011) dró BHP Billiton sig út úr samstarfi við Falkland Oil & Gas, eftir að fyrsta borunin þeirra hafði reynst árangurslaus. Og brunnurinn við Stebbing hjá Borders & Southern reyndist sem sagt þurr. Útgjöldin þarna við Falklandseyjar eru ein vísbending um það hvers konar framkvæmdir og útgjöld fyrirtækin á Drekasvæðinu munu þurfa takast á við.