Enron og Enone

Athyglisverð frétt á Moggavefnum í dag. Hlýtur að vera einhver sterkasta vísbending sem lengi hefur komið fram, um að olíuverðið hækki líklega ekki mikið meira. Eða hvað?

Nú geta menn fyrir westan hver um sig gerst eins konar vogunarsjóður í olíuviðskiptum. Það er óneitanlega minna vesen að fá sér svona semi-oilfutures, en að standa í einhverju stússi á Nymex.

Kannski rétt að bjóða upp á þetta með fleira. Væri fínt að geta rölt útí Bakarameistara og keypt sér brauðfutures nokkur ár fram í  tímann. Eða skreppa í Bónus og tryggja sér skyr á tilteknu verði út árið. Ætli þetta sé ekki barrrasta framtíðin?

Annars er athyglisvert ef olíudreifingin í US er tilbúin að selja fólki bensín fram í tímann á verði dagsins í dag. Bendir ekki beint til þess að búist sé við miklum olíuhækkunum í viðbót. Nema kannski Chevron og félagar séu orðin svo ósköp góðir að vilja gefa fólki pening.

Staðreyndin er auðvitað sú að ef þessi frétt er sönn, er þetta í reynd bara markaðsblöff. Fyrirtæki eru einfaldlega að tryggja sér viðskiptavini fram í tímann. Og þegar fólk kemur að leysa út "skömmtunarmiðana" sína kaupa margir eitthvað annað um leið. T.d. gos eða kleinuhring. Sem skapar seljandanum aukna veltu. Þar að auki er auðvitað sáraeinfalt fyrir olíufyrirtækin að tryggja sig gegn tapi á svona viðskiptum.

Fyrir íslensku olíufélögin yrði þetta pínulítið flóknara. Af því við erum með krónuvesalinginn en ekki dollar. Og kannski ekki hægt að ætlast til þess að menn þar á bæ treysti sér til að reikna svona dæmi með tveimur breytum. Segir líka sina sögu um metnað íslensku olíufélaganna að eitt þeirra skuli hafa breytt nafninu sínu í Enone. Rímar skemmtilega við Enron.

Bensín keypt fram í tímann

Athugasemdir

[Bragi, 4.7.2008 kl. 14:53]

Athyglisverð leið til að tryggja sér viðskiptavini fram í tímann.

Svekkjandi væri að nú að ganga inn í svona framvirka samninga og sjá svo bensínverðið detta niður; spurning hversu gos og hversu marga kleinuhringi framtíðarviðskiptavinirnir væru þá tilbúnir til að kaupa þegar þeir væru að leysa út skömmtunarmiðana.

[Bragi Þór Valsson (IP-tala skráð) 4.7.2008 kl. 15:17]

Ég held að íslenskir neytendur væru heldur ekkert voða sáttir ef bensínverð lækkaði svo talsvert (segjum að krónan styrkist mjög) þegar liði á árið. Þá væru þeir að borga miklu meira fyrir bensínið en aðrir.

[Bragi Þór Valsson (IP-tala skráð) 4.7.2008 kl. 18:01]

Vilhjálmur - mér finnst þetta einmitt alveg brillíant auglýsingaherferð hjá Brimborg. Ef þeir eru að borga fullt útsöluverð fyrir hvern bensínlítra (sem þeir eru náttúrulega ekki) og viðkomandi keyrir 16.000 kílómetra á ári á tiltölulega þyrstum bíl (10l/100km) þá er kaupandinn að spara um 120.000 krónur.

Oft hefur Brimborg auglýst tilboð þar sem þeir lækka bílana um meira en það. Þarna hins vegar selja þeir bílana á fullu verði en gefa þessa upphæð í afslátt í staðinn. Rosa sniðug hugmynd hjá þeim, sérstaklega þar sem þeir eru ekkert að gefa stærri afslætti en oft áður.