Hamar, sigð og dramatík

Nú hef ég verið að hlusta á Alþingismenn í 1. umræðu um hið dramatíska frumvarp, sem virðist stefnt að algerri ríkisvæðingu íslenska bankakerfisins. Og minnist "Glitnislógósins", sem ég notaði hér með færslu fyrr í morgun.

Annars er þetta líklega versta PR sem ég hef nokkru sinni kynnst. Forsætisráðherra flytur ræðu, sem gefur það eitt í skyn að Ísland kunni að standa frammi fyrir algeru efnahagslegu hruni. Og boðar einhverjir loðnar og ótilteknar aðgerðir ríkisins.

Svo er loks hálftíma síðar kynnt frumvarp, sem segir allt og um leið ekkert. Stendur til að ríkið eignist allar íslenskar fjármálastofnanir strax á morgun og hlutafé í þeim sé orðið verðlaust? Mjög einkennilegt að ekki sé jafnhliða kynnt hvað nákvæmlega standi til.

Á bloggi Egils Helgasonar sá ég þessa athugasemd nú áðan:  "Þeir fengu bankana fyrir lítið. Og það tók þá fimm ár að eyðileggja þá." 

Annars er nokkuð sérkennilegt þegar menn segja að enginn hafi getað séð fyrir þessar aðstæður. Í viðtali í sjónvarpinu áðan sagði viðskiptaráðherrann nánast orðrétt að enginn maður hefði ímydað sér að þessi staða gæti komið upp. Þetta er hreinasta rugl. Um það væri hægt að skrifa langa ritgerð - og verður eflaust gert í framtíðinni. Ég læt hér nægja að minna á varnaðarorð hagfræðingsins Nouriel Roubini. Það sem gerst hefur undanfarna daga er einfaldlega það sem Roubini spáði afdráttarlaust fyrir löngu. Og lýsti t.d. nokkuð vel í plagginu "The Rising Risk of a System Financial Meltdown - the 12 Steps to Financial Disaster".

Eini munurinn er sá að hér á landi var fjármálakerfið enn verr búið til að takast á við vandann. Vanda sem var fyrirséður. En bæði Seðlabankinn og bankarnir lokuðu augunum.

Lesa má um þróunina, sem Roubini sá fyrir, víða á Netinu. Sjá t.d. hér:   http://media.rgemonitor.com/papers/0/12_steps_NR

PS: Orkublogginu hefur borist til eyrna að stofnuð hafi verið samtökin "Málverkin heim". 

Gengi krónunnar veiktist um 11,65%

Athugasemdir

[Bjarni Ben (IP-tala skráð) 6.10.2008 kl. 21:57]

Vissulega var tiltölulega strangt til orða tekið hjá ráðherranum að segja að "engann" hafi órað fyrir þessu. En það eru til það margir hagfræðingar í heiminum með allt litrófið af skoðunum og spám um allt og ekkert. Það er þeirra vinna. Hann var kannski að meina "enginn" sem hlustandi er á. Annars er alltaf hægt að grafa einhvern upp sem slysaðist á rétta spá.

[Ketill Sigurjónsson, 6.10.2008 kl. 23:21]

Nouriel Roubini telst vart "einhver". Hann er með doktorsgráðu frá Harvard og er hagfræðiprófessor við New York University. Roubini byrjaði fyrst að vara við ástandinu árið 2004 og var af þá mörgum nefndur Dr. Dómsdagur. En líklega hafa fáar efnahagsspár ræst jafn nákvæmlega, eins og spá Roubini's.

[Bjarni Ben (IP-tala skráð) 7.10.2008 kl. 09:24]

Þá getum við hlustað á Roubini næst þegar hann segir eitthvað. Það er aldrei hægt að vita hver hefur rétt fyrir sér fyrr enn eftirá.