"Grænt" pólflug

Emirates var að byrja með nýja flugleið. Milli Dubai og San Francisco - yfir Norðurhjarann. Og markaðsdeildin hjá Emirates virðist hafa unnið heimavinnuna sína vel. Fréttir um hið stórkostlega græna pólflug Emirates ganga nú ljósum logum um netheima fjölmiðlanna.

Við fall Sovétríkjanna opnuðst ýmsir nýir möguleikar í yfirflugi. Fyrir vikið varð talsverð aukning í að flugfélög breyttu langflugleiðum sínum. Til að stytta flugleiðir var nú byrjað að fljúga yfir Norður-heimsskautasvæðin og hluta af Rússlandi. Og hefur aukist jafnt og þétt síðustu 15 árin eða svo.

Það er sem sagt ekki nýtilkomið að flogið sé yfir blessað Norðurskautið. En nýjasta flugleiðin þarna yfir er sem sagt milli Dubai og San Francisco. Og Emirates náðu athygli fjölmiðla um allan heim, með því að kynna flugið sem “worlds longest green flight”. Grænn og grípandi titill á fréttatilkynningu, sem fjölmiðar um allan heim ljósrita nú í gríð og erg og bera boðskapinn áfram.

Þetta eiturgræna flug náðist með því að velja sem allra stysta leið á glænýrri Boing 777-200LR vél. Sem nýtir eldsneyti vissulega betur en flestar aðrar farþegaþotur hafa hingað til gert.

Íslensk flugmálayfirvöld eru sögð hafa verið meðal þeirra sem gerðu þetta "einstaka og umhverfisvæna" flug mögulegt. Vélin þurfti m.ö.o. að fara um íslenskt flugumferðarsvæði.  Sem er auðvitað hið besta mál - en segir manni líka að líklega fór flugvél Emirates lítt nær Norðurpólnum en gengur og gerist í Ameríkuflugi Icelandair. Og það er óneitanlega líka vafamál, hvort þetta flug Emirates hafi eitthvað með raunverulega umhverfisvernd að gera.

Þeir ljúflingarnir þarna í hinu undarlega, olíuþverrandi furstadæmi Dubai vilja meina að með því að fara styðstu leið yfir pólinn, hafi þeir sparað rúm 7 tonn af flugvélabensíni. Og fyrir vikið losað hátt í 20 tonnum minna af koldíoxíði. Snyrtilegt.

Og ekki er verra, að í þessum nýju glæsiþotum Emirates er farþegum á fyrsta farrými boðið upp á að fara í sturtu. Það myndi Orkubloggið svo sannarlega þiggja - í flugferð sem tekur meira en hálfan sólarhring. Þetta sturtuvesen kallar reyndar á svo mikla auka vatnsflutninga, að einhverjir leiðindapúkar hafa freistast til að benda á, að þar með sé mestur orkusparnaðurinn fokinn út í veður og vind. Græna flugið drukkni sem sagt í heitri sturtu.

Þá er óneitanlega athyglisvert að Sheikinn hann Ahmed bi Saeed Al-Maktoum, stjórnarformaður Emirates, er búinn að panta heilar 55 Airbus A380S. Það fékk Airbus-menn auðvitað til að brosa breitt, enda pöntun sem líklega hljóðar upp á einhverja tugi milljarða dollara. Þessir nýju rosabelgir frá Airbus geta flutt allt að 900 farþega - en Shékinn ætlar reyndar að láta innrétta vélarnar þannig að vel fari um fólk! Fyrir vikið verður einungis pláss fyrir um 500 farþega í hinum risavöxnu Airbusum hjá Emirates. Orkubloggið hlakkar mikið til að geta teygt úr fótunum – og sinnt umhverfisvernd um leið.

Þetta verða örugglega ákaflega græn flug hjá Emirates, rétt eins og fyrsta Frisco-flugið þeirra var nú um miðjan des. Því til að spara eldsneyti eiga risabelgirnir ætíð að fá forgang á flugvellinum í Dubai. Enginn bið eftir lendingu, né flugtaki Og það á líka að endurvinna öll dagblöð, sem fara um borð. Æðislegt.

Og ég vil ekki heyra neitt tuð um það, að á meðan stóru bumburnar fái forgang þurfi nettari og gamlar Boeing 747 að bíða með alla hreyfla á fullu. Gleymið ekki að það á að endurvinna dagblöðin! Grænasta pólflug heims er staðreynd. Geisp.

Sjá má fréttina um flugið græna t.d. hér: http://www.cnbc.com/id/28366929

Athugasemdir

[Ívar Pálsson, 26.12.2008 kl. 11:21]

Takk fyrir þetta og gleðilega hátíð. Siglingar og flug um pólinn er allt annað en grænt. Loftstreymi og hafstraumar safna vandræðunum saman án þess að þau sleppi burt og blandist í filterkerfi heimsins. Mengun af flugi yfir pólinn er víst sérstaklega slæm. Mig minnir einnig að segulsvið jarðar spili þar inn, aðstreymi hlaðinna agna osfrv. Flugmenn eru víst ekki of hrifnir heldur vegna hærri geislunarstigs, pólgatið á ósonlaginu hjálpar til við það. Ætli flugið stækki gatið þá ekki aftur?

Ef pólflug yrðu vinsæl, þá gæti þó hugsast að þau sem gráta ís norðurpólsins gætu kæst aðeins, því að skýjahula (endurvarp) eykst nokkuð við flugið, sbr. yfir Los Angeles þar sem þoturnar juku það um nær 50% (kom í ljós við 11. sept. forðum). Útstrikaður pólhimininn er þó ekkert flottur.

[Þórir Már (IP-tala skráð) 26.12.2008 kl. 15:59]

Íslendingar stjórna flugumferð sem fer yfir norðurpólinn og því getur vel verið að þetta flug Emirates fari um eða ansi nálægt honum.  Hægt er að sjá yfirlitmynd af íslenska flugstjórnarsvæðinu á blaðsíðu sjö í þessum upplýsingabækling frá Flugstoðum: http://www.flugstodir.is/lisalib/getfile.aspx?itemid=312

[Halldór R. Gíslason (IP-tala skráð) 27.12.2008 kl. 19:41]

Talandi um "grænt"... Það er að mínu mati sóun, sérstaklega á peningum, að sigla hingað upp til Íslands unnum olíuvörum.

Þá er ég að meina, við getum hugsanlega sett á stofn á Íslandi mjög litla hreinistöð t.d. 20.000 bpd og selt á innlendum markaði. Það væri mun sniðugra að mínu mati að hreinsa olíuna hér heima og fá virðisaukann hér en að flytja allt inn unnið.

Svona hugleiðingar krefjast margra orða en miðað við léttan kostnaðarútreikning tel ég að ég (með góðum kunningjum) gæti komið með fljótlega um 10% af heildarkostnaði. Þetta myndi að sjálfsögðu styggja núverandi innflutnings-olíufélög, sem eru hvort eð er meira og minna að flytja inn unna olíu saman, í sömu skipunum, sbr. fyrirtækið Olídreifing.

Hvað segirðu Ketill?

[Ketill Sigurjónsson, 27.12.2008 kl. 23:51]

Takk fyrir ábendingar og athugasemdir.

Mig grunar reyndar að það myndi seint borga sig að byggja svo litla olíuhreinsunarstöð. M.ö.o. þá gæti hún varla keppt við stærri hreinsunarstöðvar, sitt hvoru megin Atlantshafsins. Þó svo ég þekki ekki arðsemisútreikninga vegna olíuhreinsunarstöðva, gæti ég trúað því að í dag setji menn ekki pening í slíkt nema framleiðslan sé a.m.k 100 þúsund tunnur á dag.

Það kemur auðvitað ekki í veg fyrir olíuhreinsunarstöð á Íslandi, að hafa hana svo stóra. Og flytja famleiðsluna út.

Bið bara menn um að setja svona starfsemi ekki niður í Arnarfirði eða í nágrenni við lítt snortnar náttúruperlur. Hvað með Helguvík?