Hverjum klukkan glymur

Mikið er nú lífið stundum undursamlegt.

Eins og t.d. fyrir örfáum dögum þegar Akureyringur sá um að loka Nasdaq-markaðnum í New York. Reyndar sá Akureyringurinn ekki alveg einn um þetta, heldur fékk smá aðstoð frá fleiri "þekktum aðilum úr viðskiptalífi heimsins". Þ.á m. var viðskiptaráðherranna okkar, Gylfi Magnússon:

8.4.2009 - 23:30:00 | ÖHÖ

Akureyringur lokar NASDAQ markaðnum í New York

Akureyringurinn Birkir Hólm Guðnason, framkvæmdastjóri Icelandair, lokaði í gær hinum þekkta Bandaríska verðbréfamarkaði NASDAQ í New York, ásamt Gylfa Magnússyni viðskiptaráðherra. Að því er blaðamaður Akureyri.net komst næst er þetta í fyrsta skipti sem Akureyringur lokar markaðnum, en í lok hvers viðskiptadags eru þekktir aðilar úr viðskiptalífi heimsins fengnir til að hringja lokunarbjöllunni.  (Frétt af vefnum Akureyri.net).

Nú er bara að vona að þetta sé ekki illur fyrirboði. Hvorki fyrir Akureyri, Icelandair né viðskiptaráðherra. Óneitanlega verður manni hugsað til þess þegar fráfarandi forsætisráðherra tók þátt í þessu bráðskemmtilega bjölluglingri á Nasdaq, síðla í september árið sem leið.

Já - það var 24. september s.l. sem brosandi og áhyggjulaus Geir Haarde fékk að hringla með Nasdaq-bjölluna. Þá var Orkubloggarinn og jafnvel öll íslenska þjóðin ennþá i skýjunum eftir Ólympíusilfur handboltalandsliðsins og horfði grunlaus fram á góða haustdaga.

Enda var gjörsamlega útilokað að lesa það út úr brosi Geirs á Nasdaq, að í reynd væri Seðlabankinn búinn afgreiða íslensku bankana sem fallnar spýtur. Hvað þá að nokkurn gæti grunað, að þessa fallegu síðsumardaga stæðu stjórnendur bankanna sveittir við að skófla út fé til einkahlutafélaga í eigu þeirra sjálfra, vina eða kunningja og voru í þann mund að krassa með feitum túss yfir allar sínar eigin persónulegu sjálfsskuldaábyrgðir.

En því miður sáu stjórnendur bankanna ekkert nema eigið rassfar og gleymdu því að maður á líka að gleðja náungann. Hefðu auðvitað líka átt að fella niður veð og persónulegar ábyrgðir húnæðislántakenda og máske einnig strika yfir bílalán til blankra viðskiptavina. Gera þetta með stæl áður en þeir hentu leifunum af þessu bévítans bankarusli í ryðgaða tunnuna hjá ríkissjóði.

Og auðvitað hefðum við öll átt að sjá þetta allt fyrir. Við hefðum átt að vita það, að þetta árans bjölluglamur hans Geirs þarna á Nasdaq, var illur fyrirboði.

Hvernig fór ekki með Decode-ævintýrið? Kári Stefánsson mætti á sínum tíma á Nasdaq og hringdi örugglega bjöllunni af mikilli list. Því miður virðist Decode nú vera að syngja sinn svanasöng - a.m.k. í núverandi mynd. Það þykir Orkubloggaranum þyngra en tárum taki. Og það er barrrasta eins og fjárans hringlið í bjöllunni á Nasdaq hreinlega leggi bölvun á íslenskt viðskiptalíf. Bloggarinn hélt að hjátrú væri nokkuð rík í íslenskri þjóðarsál - og botnar eiginlega ekkert í því að nokkur Íslendingur skuli yfirleitt þora að snerta á þessum bjölluviðbjóði!

Þetta er svo sannarlega hverfull heimur. Hér hegðuðu bankastjórnendur sér eins og enginn morgundagur kæmi. Efnahagsuppgangurinn væri allt í einu orðinn eilífur og áhættufíknin það eina sem vert væri að lifa fyrir. Icelandic Banking a la James Dean; djæfa hátt og hratt og deyja ungur! Þetta var svo sannarlega Smart Banking.

Svo fór sem fór. Lífið er ekki alltaf dans á rósum. Nú sé ég í fréttum að Nýja-Kaupþing sé farið að herja á Björgólfsfeðga vegna vanskila á einhverjum aurum sem þeir fengu að láni hjá Búnaðarbankanum eða Kaupþingi; láni sem mun hafa farið í að borga kaupin á Landsbankanum á sínum tíma. Hvaða fjárans baunatalning er þetta? Látið þessa snillinga í friði. Never send to know for whom the bell tolls - it tolls for thee!"

Athugasemdir

[Gullvagninn (IP-tala skráð) 13.4.2009 kl. 08:59]

Snilldarþankar

[HP Foss, 13.4.2009 kl. 09:26]

Ég er sammála þér með bjölluglamrið. Finnst þetta í besta falli hallærislegt, að ferðast langar leiðir til að fá að loka einhverjum vinnustað. Er einnig frekar barnalegt. Maður hætti að hafa gaman af svona löguðu um 7 ára aldurinn, að fá að læsa einverju.  Bílnum, útihurðinni, hverju sem var.

Svo er það hitt, að þetta sé hættulegt. Manni var kennt sem ungum manni að telja aldrei kindurnar á leið út úr fjárhúsinu. Þetta gæti verið sami hættulegi leikurinn.

Bestu kveðjur- Helgi

[Andri Geir Arinbjarnarson, 13.4.2009 kl. 15:06]

Er ekki til mynd þegar Enron forstjórinn lokaði Nasdaq?

[Sveinn hinn Ungi (IP-tala skráð) 13.4.2009 kl. 18:24]

Sæll Ketill. Takk fyrir þetta frábæra blogg hjá þér. Ég les hverja einustu færslu en er ekkert að kvitta sérstaklega fyrir að jafnaði.

Ég var að skoða línuritin hérna á vinstri spássíunni hjá þér og tók eftir að gasið er á $3,6 eftir stanslaust fall frá um $14.

Hvert ætli sé kostnaðarverð á gasi? Er þetta ekki komið niðurfyrir það? Eru einhverjar árstíðabundnar verðsveiflur á gasi?

Gas er hægt að kaupa t.d. gegn um Etrade undir heitinu: NYSE:UNG.