Suckers Rally?

Hvert stefnir hlutabréfamarkaðurinn?

Orkubloggið beinir þessari spurningu auðvitað ekki að hinum sjálfdauða, gjörspillta og úldna íslenska hlutabréfasandkassa Bakkvararbræðra og félaga þeirra. Nei - hér er ekki verið að tala um þá ljúfu "sakleysingja". Heldur þvert á móti um sjálft markaðstorg guðanna - bandarísku hlutabréfin!

Vestra hafa spekúlantar fyllst nokkurri bjartsýni undanfarnar vikur og hlutabréf tekið að hækka á ný. Hjá JPMorgan segja menn nú að bandarísk hlutabréf hækki líklega um 20% til ársloka 2009. Og hækkunin í Asíu verði jafnvel ennþá meiri - kreppan sé senn á enda og Kína u.þ.b. að komast aftur í stuð.

Í samræmi við bjartsýni af þessu tagi hefur líka komið smá kippur í olíuverðið. Þann kipp má að einhverju leyti einfaldlega rekja til veikingu á dollar. En það hefur a.m.k. ekki gerst að við sæjum olíuverðið hrapa niður í 20 dollara tunnan - eða jafnvel ennþá lægra eins og útlit var fyrir á tímabili. Þess í stað tók verðið að skríða upp á við. Reyndar þykir Orkublogginu það nú vera furðu hátt miðað við aðstæður (hátt í 60 dollarar tunnan).

Hefur botninum kannski verið náð í hlutabréfafallinu? Fyrr í vikunni talaði einn "sérfræðingurinn" um að snemma í mars s.l. hefðum við ekki aðeins séð botninn - heldur hafi þar hvorki meira né minna en verið um að ræða lægð kynslóðarinnar. Sem sagt sögulegt augnablik.

Héðan í frá muni leiðin almennt liggja upp á við - og okkar kynslóð eigi aldrei eftir að upplifa þvílíka hroðastöðu Dow Jones (DJIA) eins hún lagðist í fyrir fáeinum vikum. Uppgangurinn eigi þó eftir að verða með svakalegum upp- og niðursveiflum næstu mánuðina og margir eigi eftir að brenna sig illilega þar.

Það var Doug nokkur Kass, sem hafði þetta til málanna að leggja (á myndinni hér til hliðar er hann með systur sinni; listakonunni Debóru Kass). Doug Kass er forstjóri verðbréfafyrirtækisins Seabreeze Partners - sem Orkubloggaranum þykir reyndar frekar óáreiðanlegt nafn á fjármálafyrirtæki og að heiti sem þetta passi t.d. betur á ilmvatnsframleiðanda. En þessi gráskeggjaði ljúflingur virðist vita sínu viti, eins og nú skal gerð smá grein fyrir.

Kass sagði að vísu að hækkanirnar undanfarið hafi verið óeðlilega hraðar og nefndi uppsveifluna “Miley Cyrus sveiflu”. Hvorki hlutabréfin né stelpuskottið hún Miley Cyrus eigi innistæðu fyrir miklum vinsældum sínum þessa dagana. Fólk sé barrrasta að láta ytra útlit blekkja sig, en ekki að horfa til innihalds eða framtíðar!

Kass viðurkennir reyndar að í dag sé erfitt að hugsa mikið um framtíðina - skyndikynni skili hugsanlega mestu á hlutabréfamarkaðnum nú um stundir. Nákvæmlega ekkert vit sé í buy & hold þessa dagana.

Það virðist reyndar vera alveg þess virði að hlusta á Doug Kass. Hann var einn fárra sem sáu fyrir hrunið. Árið 2007 sagði hann að húsnæðisbólan væri sprungin; afleiðingarnar yrðu mikill samdráttur í smásölu árið 2008 og að fjármálastofnanir myndu lenda í gríðarlegum erfiðleikum. Á sama tíma spáði hann mikilli hækkun olíuverðs og taldi að við myndum jafnvel sjá olíuna rjúka í 135 dollara tunnuna á árinu 2008.

Þetta þótti mönnum vel í látið - en þessi spá rættist ótrúlega vel. Reyndar fór olían ennþá hærra um mitt árið 2008 sem kunnugt er; yfir 140 dollara. Kass var líka löngu búinn að átta sig á slæmum fjárfestingum Warren's Buffet og hefur þar að auki spáð því að Berkshire Hathaway sé í reynd búið að vera! Ekki alveg í orðsins fyllstu merkingu, en að héðan í frá muni leið þess mæta fjárfestingafyrirtækis liggja niður á við. All svakalegt ef satt reynist.

Loks má nefna að 2007 spáði Kass líka risastórum banka-skandölum í Evrópu í anda Enron: "There are several major Enron-like accounting scandals in 2008, causing investor confidence to plummet; these will come in some large financial companies in Europe”. Skyldi kallinn kannski sérstaklega hafa haft Ísland þarna í huga?

Já - það voru mörg fyrirtæki sem ekki áttu innistæðu fyrir himinháu verðmati hins óskeikula (sic) markaðar undanfarin ár. En hvort réttlætanlegt er að bendla Miley Cyrus eitthvað við það, er kannski annað mál.

Það er reyndar ekki fyrr en maður les spá Kass fyrir 2009, sem hrollurinn fer að færast yfir fyrir alvöru. T.d. segist hann fullviss um að svikamylla Bernie's Madoff hafi aðallega falist í að þvo peninga fyrir rússnesku mafíuna. Er einhverjum fleirum sem þykir athyglisverð sú hugmynd að umsvifamiklir fjárfestar síðustu ára hafi bara verið leppar Rússamafíunnar?

Hvort spá Kass um "genrational low" í mars s.l. rætist, á eftir að koma í ljós. Kannski rétt að minnast þess að ofurspámaðurinn Nouriel Roubini hefur notað eilítið annað orðalag um uppsveifluna undanfarnar vikur. Kallar hana einfaldlega "suckers rally". Bjánauppsveiflu!  En þó svo Roubini sé öllu svartsýnni en Kass, eru þeir kumpánarnir a.m.k. sammála um að stöðugleiki sé ekki alveg í augsýn.

Orkubloggið freistast til að veðja á Roubini og að við eigum eftir að sjá enn verri hlutabréfadýfu en til þessa. Fyrir bloggið er þó áhugaverðara að sjá hverju Kass spáir um olíuverðið 2009: Í spá sinni í árslok 2008 sagði hann að það myndi hækka mikið á fyrri huta ársins 2009 og það gekk svo sannarlega eftir. En Kass telur að yfir árið muni verðið vera að sveiflast þetta milli 25 og 65 dollara. Eins og þróunin hefur verið upp á síðkastið virðist reyndar sem olíuverðið geti jafnvel farið enn hærra. En kannski er vissara að taka mark á Kass?

Þetta lága á olíuverð telur Kass að muni skapa gríðarlega fjárfestingastíflu í olíuiðnaði Mið-Austurlanda. Það eru reyndar engar fréttir fyrir dygga lesendur Orkubloggsins! Og við hljótum að sjá olíuverðið hreinlega æða upp í hæstu hæðir þegar efnahagslífið nær sér aftur á strik. Þá mun framboðið hvergi geta mætt eftirspurninni og spákaupmennirnir græða svo stjarnfræðilegar upphæðir á fáeinum mánuðum að öllum verður flökurt. Öllum nema Orkubloggaranum auðvitað.

Aftur á móti vill Orkubloggið vara menn við að trúa því, að olíuverð fari varanlega upp í 200 dollara tunnan eða þaðan af hærra. Það þykir voða smart nú að spá slíku verði. Staðreyndin er aftur á móti sú að svo hátt olíuverð myndi draga svo svakalega úr eftirspurninni að verðið myndi lækka hratt aftur.

Athugasemdir

[Már Wolfgang Mixa, 18.5.2009 kl. 09:18]

Að spá svo og svo mikla lækkun/hækkun verðbréfa er vonlaust verk.  Frekar á að geta sér til um hvort að ákveðnir markaðir séu undir- eða yfirverðlagðir.  Hvað efnahagsmál varðar þá eru hlutabréfamarkaðir nánast besta vísbendingin um stefnu þeirra.  Skuldabréfamarkaðir veita einnig sterkar vísbendingar, t.d. sú staðreynd að ávöxtunarkrafa 30 ára ríkisbréfa var lægri en styttri bréfa 2 sinnum á þessum áratug, árin 2000 og 2007, 12 mánuðum áður en kreppa átti sér stað. 

Þær tölur sem ég hef notað síðustu ár og hafa reynst mér vel gefa til kynna að hlutabréf í USA hafi ekki verið jafn ódýrt verðlögð í langan tíma.

[Ásgeir Rúnar Helgason, 18.5.2009 kl. 09:48]

Mikill eðalbloggari ertu Ketill! Þið Jón Steinar Ragnarsson ættuð að stofna félag eðalbloggara. Þið leggið báðir mikla vinnu í þetta og fagurfræðin er ekki síðri en innihaldið.

[Georg O. Well (IP-tala skráð) 18.5.2009 kl. 10:28]

Spár um framgang þessara mála eru auðveldari ef fólk les fréttir af skuggastjórnmálunum, valdamönnum sem funda undir eins mikilli leynd og þeir komast upp með.

Ég hef einmitt verið að þýða fréttir frá fundi Bilderberg manna sem var að ljúka í Grikklandi.  Þar voru efnahagsmálin efst á baugi.

Bilderberg kalla á alþjóðlegt fjármálaráðuneyti

Hörmungar virkjaðar af vandræðamönnum

[Sveinn hinn Ungi (IP-tala skráð) 18.5.2009 kl. 12:10]

Ég tek undir það, að hér hjá Katli er um algjört eðalblogg að ræða.

Á NYSE markaðnum er hægt að kaupa bréf sem virka eins og skortsala x 3, undir heitinu BGZ. Það er að segja, fari markaðurinn niður um 1% þá hækka þessi bréf um 3% og öfugt.

Einnig er hægt að kaupa bréf sem fylgja markaðnum með jákvæðu formerki x 3, undir heitinu NYSE:BGU.

Þessi bréf er hægt að kaupa á íslenska Etrade.

(Sjá lista hjá Google)

[Ketill Sigurjónsson, 18.5.2009 kl. 23:59]

New Bull Or Sucker's Rally?:

Hedge fund manager Andy Kessler: “I think the whole (rally) is engineered to solve the bank problems. I don’t have a problem with that but I don’t want to be the sucker buying into the rally.”

http://www.cnbc.com/id/30706395