Vangaveltur um W

Orkubloggið hefur um nokkurt skeið lýst þeirri skoðun sinni að tvöfalt-waffið  sé líklegt. Að enn eigi eftir að koma djúp dýfa í efnahagslíf veraldar, sem muni gera kreppuna enn verri, áður en raunverulegur bati hefst. Svo gæti þetta auðvitað orðið enn flóknara; þrefalt-U eða fjórfalt WW!

En hvernig og hvenær mun þessi seinni dýfa þá koma? Ef þessi spá rætist, er allsendis óvíst hvar fyrstu merki seinni dýfunnar munu sjást. Það mun ekki sýna sig fyrr en eftir á, hvort táknin verði lækkun á dollar, lækkun á hlutabréfum eða lækkun á olíuverði.

Þessi svartsýni spádómur byggist aðallega á því að uppsveiflan síðustu mánuðina sé í reynd fölsk. Að hún sé fyrst og fremst drifin áfram af sértækum en ósjálfbærum efnahagsaðgerðum Kína, ESB og þó fyrst og fremst Bandaríkjanna. Hvorki það að veita fólki styrki til að leggja gamla skrjóðnum og kaupa nýjan bíl eða sérstakan skattaafslátt vegna húsnæðiskaupa, er nóg til að byggja upp og viðhalda efnahagsbata. Þegar draga fer úr áhrifum slíkra aðgerða og ríki leggja ekki í fleiri rándýr úrræði, kemur nýr skellur. Líklega.

Orkubloggið veltir eðlilega mest fyrir sér, hvaða áhrif þetta muni hafa á olíuverð. Bloggarinn hefur séð vísa en varkára menn vera að spá ca. 20% verðlækkun á hlutabréfum og 30% verðlækkun á olíu vegna seinni dýfunnar. Sem myndi þýða að olíuverðið færi niður í u.þ.b. 50-55 dollara tunnan. Orkubloggarinn yrði þó ekki hissa þó verðið færi tímabundið ennþá lægra. Birgðastöðvar virðast víðast ennþá vera yfirfullar af olíu og ekki þarf mikinn hiksta til að menn fari í paník við að losa sig út úr olíusamningum. Þá gæti steininn fallið.

En ef þetta gerist, hvenær verður það? Snemma árs 2010 segja sumir. Að þá muni botn kreppunnar líta dagsins ljós. Þetta gæti þó auðveldlega dregist talsvert lengur. Hér er auðvitað verið að tala um hina alþjóðlegu kreppu með fókusinn á Bandaríkin. Ísland aftur á móti, með ofurskuldir, ónýtan gjaldmiðil og afborganir af Icesave á sér auðvitað ekki viðreisnar von. Fyrr en eftir mörg ár.

Nú eru sumir farnir að tala um þann möguleika að Neyðarlögunum verði hnekkt fyrir dómstólum. Með þeim afleiðingum að skuldabyrði ríkissjóðs verði ennþá meiri en áætlað hefur verið. En kannski munu Hæstaréttardómararnir sem hafa verið svo duglegir við að sýkna Jón Ásgeir og lækka sektir í samkeppnismálum, loksins taka af skarið og koma í veg fyrir að Weimar-lýðveldi 21. aldarinnar muni fæðast hér í norðri.

Þá er ótalið hvað EES-dómstóllinn myndi segja. Það er stjórnskipulega hæpið að hann geti breytt einhverju um niðurstöðu Hæstaréttar; yfirþjóðlegt vald skv. EES-samningnum er mjög takmarkað. En hvað sem því líður, þá bendir allt til þess að hér séu að skapast Paradísarskilyrði fyrir okkur lögfræðingana.

 

Athugasemdir

[Hólmfríður Pétursdóttir, 25.11.2009 kl. 08:46]

Sætur bangsi í dvala og hvergi naut að sjá.

[Ketill Sigurjónsson, 25.11.2009 kl. 16:13]

Þetta er Mikki mús!

[Gunnar Kristinn Þórðarson (IP-tala skráð) 26.11.2009 kl. 00:47]

Þetta eru orð í tíma töluð.  Þessi svokallaði hagvöxtur sem við upplifum núna er afrakstur beinna efnahagsaðgerða og fjárfestinga opinberra sjóða nýmarkaðsríkja.  Hluti af þessu eru kaup nýmakaðsríkja, eins og Kína, á hrávörum vegna ótta við hrun dollars.  Neysla fyrirtækja er eilítið að aukast en neysla almennings ekki, þrátt fyrir að það séu að koma jól.  Í raun ætti allt að vera á fljúgandi siglingu vegna þessa. Framundan er gjaldeyriskreppa og skuldakreppa, sem mun leiða heiminn í alkul í alþjóðaviðskiptum og koma hnattvæðingunni fyrir kattanef, amk fyrir næsta áratuginn.

[Haraldur Rafn Ingvason, 26.11.2009 kl. 19:48]

Verður það Dubai sem setur næstu niðrusveiflu af stað???

http://www.bloomberg.com/apps/news?pid=20601087&sid=aRsjlClzl500

[Jón Lárusson, 27.11.2009 kl. 08:03]

Gæti trúað núverandi ástandi til að vera svokallað "bear-trap", en þær gildrur eru algengar í kjölfar niðursveiflna eins og við erum að upplifa núna. Reyndar er áhugavert að skoða S&P500 vísitöluna, en niðursveiflan núna fór í um 8 - 900 stig, sem er um 6% meðalvöxtur frá því snemma á níunda áratugnum. Þarna ætti að vera jafnvægið, en venjulega þá fara leiðréttingar niðurfyrir meðaltöl og því spurning hvort ekki sé kominn spenna á að "testa" þetta svæði aftur. Gæti því trúað S&P500 til að fara aftur þarna niður í kjallara. Gerist það, er óvíst hvernig panikkin í markaðnum bregst við. Hann er voða viðkvæmur í svona ástandi og ekki ólíklegt að það verði teknar hraðlestir þegar fjárfestar losa stöðurnar sínar.

Annars er kerfið okkar þannig að við komum til með aðhorfa upp á svona rússibana á 15 - 20 ára fresti. Hef mælt með því að við endurskipuleggjum fjármálakerfið frá grunni til að losa okkur úr viðjum þessarar vitleysu. Bendi á www.umbot.org fyrir þá sem hafa áhuga á að kynna sér nýjar hugmyndir.

[Ketill Sigurjónsson, 27.11.2009 kl. 13:27]

Nú er bara spurningin hvort Ísland er Dubai norðursins eða hvort Dubai er Ísland Persaflóans.

Tvö lönd sem byggðu efnahagslegan uppgang sinn á alltof hröðum byggingaframkvæmdum og þó fyrst og fremst tóku góðærið að láni.

Bæði löndin létu sig dreyma um að verða fjármálamiðstöð. Í Dubai voru þeir komnir skrefi lengra í þeim draumi; búnir að stofna Borse Dubai og voru á tímabili næstum búnir að eignast norrænu kauphöllina OMX.

Í staðinn eignuðust þeir stóran hlut í kauphöllinni í London í mikilli fjármálafléttu. Gæfulegt fyrir fjármálamiðstöðina miklu í ríki Gordon´s Brown, ef einn stærsti hluthafinn er á leið í þrot. Spurning hvort Katararnir geti þá loks látið draum sinn rætast, um að ná stjórn á LSE, eins og þeir hafa lengi stefnt að.